مادّہ ع ل و

(ن) عَلَا يَعْلُوْ عُلُوًّا: (۱) بلند ہونا (۲) کسی چیز پر چڑھنا، چڑھائی کرنا، غالب ہونا (۳) سرکشی کرنا، بغاوت کرنا۔ عُلُوٌّ (اسمِ ذات بھی): بلندی، بڑائی۔ ﴿وَلَعَلَا بَعْضُهُمْ عَلٰى بَعْضٍ﴾ (المؤمنون ۲۳:۹۱)؛ ﴿تِلْكَ الدَّارُ الْاٰخِرَةُ نَجْعَلُهَا لِلَّذِيْنَ لَا يُرِيْدُوْنَ عُلُوًّا فِي الْاَرْضِ﴾ (القصص ۲۸:۸۳)

اَعْلٰى، مؤنث عُلْيَا (اَفْعَلُ اور فُعْلٰى کے وزن پر اسم التفضیل): زیادہ بلند، سب سے بلند، غالب (اردو میں «اعلیٰ» اسی معنی میں)؛ جب اس کی نسبت اللہ تعالیٰ کی طرف ہو تو مطلب ہوتا ہے انتہائی بلند، مطلق بلند۔ ﴿سَبِّحِ اسْمَ رَبِّكَ الْاَعْلٰى﴾ (الاعلٰی ۸۷:۱)

عَالٍ (اسم الفاعل، صفت کے طور پر بھی): بلند ہونے والا، یعنی بلند (اردو میں «عالی» اسی معنی میں)۔ عَلِيٌّ (فَعِيْلٌ کے وزن پر صفت): ہمیشہ اور ہر حال میں بلند۔ عِلِّيٌّ (اسم ذات): بلندی۔ ﴿وَهُوَ الْعَلِيُّ الْعَظِيْمُ﴾ (البقرۃ ۲:۲۵۵)

(تفاعل) تَعَالٰى يَتَعَالٰى تَعَالِيًا: دوسروں سے بلند ہونا۔ تَعَالَ ج تَعَالَوْا (فعلِ امر): تو بلند ہو، تو اٹھ؛ پھر زیادہ تر «تو آ» کے معنی میں آتا ہے۔ مُتَعَالٍ (اسم الفاعل، صفت کے طور پر بھی): دوسروں سے بلند۔ ﴿فَتَعٰلَي اللّٰهُ الْمَلِكُ الْحَقُّ﴾ (المؤمنون ۲۳:۱۱۶)

(استفعال) اِسْتَعْلٰى يَسْتَعْلِيْ اِسْتِعْلَاءً: بلندی یا غلبے کی کوشش کرنا، یعنی بلند ہونا، غالب ہونا۔ ﴿وَقَدْ اَفْلَحَ الْيَوْمَ مَنِ اسْتَعْلٰى﴾ (طٰہٰ ۲۰:۶۴)